Why we named our daughter Whisper

Iw Pi Égasknezowat gi Bodéwadmik”

éshnekadék ode atsokas.

Ode se atsokas égi widmoshet o ndenim wgyéyomen, Zhikwés éshnekasot o…

Ngotek ga zhewébek égi zagdenashkowat manék gi Neshnabék ibe se ni shkwongenen émawdowat géwinwa ni gchemokmanen, nesh je anet gi Neshnabék égi wébiwéwat ibe kiwédnon égi pabmadsewat nekmek ngoji, égi dneswat ibe McCord mine Star Lake mine Pkwakik éshnekadénon ni Neshnabé odanésen.

Iw pi émawjeshnowat gi Neshnabé penojék égi byénawat ibe se i ngot skonogemek, Wittenberg Lutheran School égi shnekadék.  Manék gi Neshnabé penojék égi skonowat ézhi…Wjibwék mine Wdawak mine Menominik mine Bodéwadmik mine Winbyégok gi yawik zhi. 

Épenojét o Zhikwés édneset i skonogemek ébsedwat ni Winbyégo gigyagoyen ékedwat i Winbyégo zheshmowen…”Hau, guday, minageday…oh, pinegigi…” égi kedwat nangodgen gi Winbyégo gigyagoyek.

Oh, éshkadzewat ni niganinjen, éneshkamawat ma shna nangodgen éwepodwet gi Winbyégok égi dabjetowat i Winbyégo zheshmowen. 

Bgéji ézegzewat gi Bodéwadmi penojék.  “Hau, épich ndemagziyak gishpen éwi ngetoyak gzheshmownenan,” ézhedé’awat gi Bodéwadmi penojék édneswat se i skonogemek. 

“Wégni je wa zhechkéyak ébwa wépodoshek gé ninan?” ékedwat géwinwa.

“Hau, éwi gasknezoyak gishpen ékigdoyak,” épij wnakwnegéwat.

Hau, iw je pi gi Bodéwadmi penojék égi gasknezowat ébwa ngetowat ode zheshmowen.  I yé i ga zhewébek ibe se i skonogemek ngotek.

Ngom se she égi wawinaygo o ndansémen “Whisper” éshnekasot émikwendemyak égi gasknezowat gi Bodéwadmi penojék ngotek ébwa ngetowat ode zheshmowen.

Iw énajmoyan.  Zagjewékwé ndeshnekas.

Original version:  No obviatives, No present tense

Ode se atsokas égi widmoshet o wgyéyom se ndenimen, Zhikwés éshnekasot…

“Iw Pi Égi Gasknezowat gi Bodéwadmik” éshnekadék ode atsokas.

Ngotek ga zhewébek égi zagdenashkowat manék gi Neshnabék ibe se ni shkwongenen émawdowat géwinwa gi gchemokmanek, nesh je anet gi Neshnabék égi wébiwéwat ibe kiwédnon égi pabmadsewat nekmek ngoji, égi dneswat ibe McCord mine Star Lake mine Pkwakik éshnekadénon ni Neshnabé odanésen.

Iw pi émawjeshnowat gi Neshnabé penojék égi byénawat ibe se i ngot skonogemek, Wittenberg Lutheran School égi shnekadék.  Manék gi Neshnabé penojék égi skonowat ézhi…Wjibwék mine Wdawak mine Menominik mine Bodéwadmik mine Winbyégok gi yawik zhi. 

Égi penojét o Zhikwés égi dneset i skonogemek égi bsedwat gi Winbyégo gigyagoyek égi kedwat i Winbyégo zheshmowen…”Hau, guday, minageday…oh, pinegigi…” égi kedwat nangodgen gi Winbyégo gigyagoyek.

Oh, égi shkadzewat gi niganijek, égi neshkamawat ma shna nangodgen égi wepodwat gi Winbyégok égi dabjetowat i Winbyégo zheshmowen. 

Bgéji égi zegzewat gi Bodéwadmi penojék.  “Hau, épich ndemagziyak gishpen éwi ngetoyak gzheshmownenan,” ézhedé’awat gi Bodéwadmi penojék édneswat se i skonogemek. 

“Wégni je wa zhechkéyak ébwa wépodoshek gé ninan?” égi kedwat géwinwa.

“Hau, éwi gasknezoyak gishpen ékigdoyak,” égi wnakwnegéwat.

Hau, iw je pi gi Bodéwadmi penojék égi gasknezowat ébwa ngetowat ode zheshmowen.  I yé i ga zhewébek ibe se i skonogemek ngotek.

Ngom se she égi wawinaygo o ndansémen “Whisper” éshnekasot émikwendemyak égi gasknezowat gi Bodéwadmi penojék ngotek ébwa ngetowat ode zheshmowen.

Iw énajmoyan.  Zagjewékwé ndeshnekas.

Author: neaseno

I was born on Powers Bluff in Wood County, Wisconsin, into a traditional community of Neshnabek. I was raised speaking only native languages, and learned to speak English upon entering school at the age of 6. As of this writing, I am one of 5 remaining Heritage Fluent Speakers of Potawatomi.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s